ബിൽക്കീസ് ബാനുവും നീതിപീഠത്തിന്റെ വിവേചനങ്ങളും

Support Keraleeya

Help us in our pursuit for high-quality journalism!

Our commitment to uncovering requires your backing. Support our fearless investigative reporting, in-depth analyses and community voices. Donate now to strengthen the editorial independence and provide open access content to all.

Support Keraleeyam Choose your preference

₹1000/Year

₹2000/2 Years

₹500Students/Year

A contribution of any size

ONE TIME
right-bg

“ദാ നോക്ക്… ഒരു കാര്യം സത്യമാണ്. ഭൂഖ് ഖുസേ തോ കോയി നാ കോയി തോ ഫൽ ഖായേഗാ, നാ?? (നൂറുകണക്കിന് വിശപ്പുള്ള മനുഷ്യർ ഒരിടത്ത് എത്തിയാൽ അതിൽ കുറച്ചുപേർ അവിടെ കാണുന്ന പഴമൊക്കെ എടുത്ത് കഴിച്ചെന്നു വരും. അല്ലേ?..) ഐസേ ഭീ, ഫൽ തോ കുച്ചൽ കേ ഫേക് ദേംഗാ… (എന്തായാലും പഴം നമ്മൾ ചവിട്ടിയരച്ച് നശിപ്പിക്കാൻ പോവുകയാണ്. നോക്കൂ, ഞാൻ എന്തായാലും നുണ പറയാൻ പോകുന്നില്ല).

അമ്മ (സാങ്കൽപ്പിക ദേവീ വിഗ്രഹത്തെ തൊഴുത് കൊണ്ട്) എന്റെ മുന്നിലുണ്ട്. മുസ്ലിം പെമ്പിള്ളേരെ മുഴുവൻ കൊന്ന് തീയിലെറിയുകയായിരുന്നു എന്തായാലും. അപ്പോ ചിലരാ പഴമൊക്കെ ഒന്ന് കഴിച്ചു നോക്കി. അവരെ എത്രമാത്രം ഉപദ്രവിക്കാൻ പറ്റുമോ അത്രേം ചെയ്യണം… എനിക്ക് അവരെ അത്രയ്ക്ക് വെറുപ്പാണ്. അവരെ വെറുതെ വിടാൻ പറ്റില്ല. നോക്കൂ കാര്യം എന്റെ ഭാര്യ ഇവിടെത്തന്നെ ഇരിപ്പുണ്ട്. പക്ഷേ, കാര്യം പറയട്ടെ, അവിടെ പഴമുള്ള സ്ഥിതിക്ക് അത് തിന്നുന്നതിൽ എന്താണ് തെറ്റ്? ഞാനും ഒന്ന് തിന്നു, ഞാനും ഒന്നു തിന്നു. ഒറ്റൊരെണ്ണം.”

ആഷിഷ് അമർത്തി ചോദിച്ചു: “ഒറ്റൊരെണ്ണം?”

സുരേഷ് മറുപടി പറഞ്ഞു: “ഒറ്റൊരെണ്ണം” എനിക്ക് വീണ്ടും കൊല നടത്താൻ പോകണമായിരുന്നു. ഏതായിരുന്നു? (അടുത്തിരുന്ന ബന്ധു പ്രകാശ് റാത്തോഡിനോട് അയാൾ ബലാൽസംഗം ചെയ്തുകൊന്ന സ്ത്രീയെ കുറിച്ച് സംസാരിക്കുന്നു) ആ ആക്രിക്കച്ചവടക്കാരന്റെ മോൾ നസീമ… നസീമ… തടിച്ചു തുടുത്ത ഒരുത്തി. ഞാൻ അവളുടെ മേത്ത് കേറി.

ആഷിഷ് ചോദിച്ചു:” അത് പിന്നെ ജീവിച്ചോ?” സുരേഷ് പറഞ്ഞു: “എവിടുന്ന്?? ഇല്ലില്ല, ഞാനവളെ അടിച്ചടിച്ചു കൊന്നു… അച്ചാറാക്കി മാറ്റി…”

രേവതി ലോൾ തന്റെ ‘വെറുപ്പിന്റെ ശരീര ശാസ്ത്രം’ എന്ന പുസ്തകത്തിൽ 2002 ഗുജറാത്ത് വംശഹത്യയുടെ ഭീകരതയെ വിവരിക്കുകയാണ്. ബിൽക്കീസ് ബാനുവിനെ പോലൊരു സ്ത്രീയായിരുന്നു നസീമയും. പക്ഷേ അവൾ ഇന്നില്ല.

ബിൽക്കീസ് ബാനു

നീതിപീഠം ഒരുതവണ കൂടി രാജ്യത്തെ മനസാക്ഷിയുള്ള ഒരുകൂട്ടം ജനതയെ വഞ്ചിക്കുന്ന ഉത്തരവ് പുറപ്പെടുവിച്ചിരിക്കുകയാണ്. കഴിഞ്ഞ നവംബർ പതിനാറിനാണ് ബിൽക്കീസ് ബാനു കേസിലെ ബിപിൻചന്ദ്ര ജോഷി, പ്രദീപ് മോധിയ എന്നീ പ്രതികൾക്ക് ജീവപര്യന്ത ശിക്ഷ മരവിപ്പിച്ച് സുപ്രീം കോടതി ജാമ്യം അനുവദിച്ചത്. പതിനേഴിലധികം വർഷമായി ജയിൽ വാസം അനുഭവിക്കുന്നുവെന്നും വിട്ടയച്ച പ്രതികളിലൊരാൾക്ക് കാഴ്ചക്ക് അസുഖമുണ്ടെന്നുമായിരുന്നു സുപ്രീം കോടതിയുടെ വാദം.

2002 ലെ ​ഗുജറാത്ത് വംശഹത്യയിൽ കൊല്ലപ്പെട്ടവരുടെ പ്രതീകമാണ് ബിൽക്കീസ് ബാനു എന്ന സ്ത്രീ. അഞ്ച് മാസം ഗർഭിണിയായിരുന്ന ബിൽക്കീസിനെ കലാപകാരികൾ ബലാൽസംഗപ്പെടുത്തുകയായിരുന്നു. അന്നവ‍ർക്ക് 19 വയസ്സായിരുന്നു. ഒരുമ്മയുടെ കണ്മുന്നിൽ നിന്ന് മൂന്ന് വയസ്സ് മാത്രം പ്രായമുള്ള സ്വാലിഹ എന്ന പൈതലിനെയടക്കം ഏഴ് കുടുംബാംഗങ്ങളെ നിഷ്കരുണം അന്ന് കൊലപ്പെടുത്തിയത് ഭരണ കൂടത്തിന്റെ പൂർണമായ ഒത്താശയോട് കൂടെയായിരുന്നു. രാജ്യത്തിന്റെ പ്രധാനമന്ത്രി അന്ന് ഗുജറാത്ത് മുഖ്യമന്ത്രിയും, കേന്ദ്ര ആഭ്യന്തര മന്ത്രി അമിത് ഷാ ഗുജറാത്തിലെ മുതിർന്ന ആർഎസ്എസ് നേതാവും നിയമസഭാം​ഗവുമായിരുന്നു.

വിധി പ്രസ്താവനയിലെ വലിയൊരു പിഴവ് ഇരയായ ബിൽക്കീസിന്റെ ശബ്ദം ആ കോടതിയിൽ പ്രതിഫലിച്ചതേയില്ല എന്നതാണ്. പ്രതികൾക്ക് ജാമ്യം അനുവദിച്ച് വെറുതെ വിട്ടിരിക്കുന്നുവെന്ന കാര്യം വാർത്താ മാധ്യമങ്ങൾ വഴിയാണ് ബിൽക്കീസ് പോലും അറിയുന്നത്. 2002 മുതലിങ്ങോട്ട് നീണ്ട 24 വർഷക്കാലം അവൾ പൊരുതുകയായിരുന്നു. ആ പോരാട്ടം നസീമ അടങ്ങുന്ന എല്ലാവിധ ഇരകൾക്ക് വേണ്ടി കൂടിയുള്ളതായിരുന്നു. പക്ഷേ, നീതിപീഠത്തിൽ വിശ്വസിച്ച ബിൽക്കീസിന് പിഴച്ചിരിക്കുന്നു. വിധി പ്രസ്താവനാനന്തരം ബിൽക്കീസ് ബാനു പറയുന്നതിങ്ങനെയാണ്:

“ഇപ്പോൾ ഞാൻ കഷ്ടപ്പെട്ടതെല്ലാം വെറുതെയായെന്ന് തോന്നിപ്പോകുന്നു. നീതി ഇനിയും എത്രയോ ദൂരത്താണെന്ന് എനിക്ക് തോന്നുന്നു. അതേ പഴയ ഭയം എന്നെ വീണ്ടും അലട്ടാൻ തുടങ്ങിയിരിക്കുന്നു. നീതിയിലുള്ള വിശ്വാസം വീണ്ടും നഷ്ടപ്പെടുമോ എന്ന് ഞാൻ ഭയപ്പെടുന്നു.”

ഗുജറാത്ത് സർക്കാർ ശിക്ഷായിളവ് നൽകി പുറത്തുവിട്ട പ്രതികൾക്ക് 2022ൽ നൽകിയ സ്വീകരണം. കടപ്പാട്: PTI

നാല് വർഷങ്ങൾക്ക് മുമ്പ്, കൃത്യം പറഞ്ഞാൽ 2022 ആഗസ്റ്റ് 15 സ്വാതന്ത്ര്യ ദിനത്തോടനുബന്ധിച്ച് വംശഹത്യാ കേസിലെ പതിനൊന്ന് പ്രതികൾക്കും ഗുജറാത്ത് സർക്കാർ സ്ഥിരമായ ശിക്ഷായിളവ് നൽകിരുന്നു. പതിനഞ്ച് വർഷത്തോളം പ്രതികൾ തടവ് ശി​ക്ഷ അനുഭവി​ച്ചതും നല്ല നടപ്പും പരി​ഗണിച്ചായിരുന്നു ‘കരുണയുള്ള’ ഗുജറാത്ത് സർക്കാർ ജീവപര്യന്തം തടവുകാരായ പതിനൊന്നു പ്രതികളേയും അന്ന് വി​ട്ടയച്ചത്. അന്ന് ആ പ്രതികളെ ബിജെപി പ്രവർത്തകർ മാലയിട്ടും മധുരം നൽകിയും സ്വീകരിച്ചത് വലിയ വാ‍ർത്തയായി മാറിയിരുന്നു. പക്ഷേ, സുപ്രീം കോടതി ഈ വിഷയത്തിൽ നീതിപൂർവ്വം ഇടപെട്ടു. ചില സുരക്ഷാ കാരണങ്ങൾക്ക് വേണ്ടി മുമ്പേ തന്നെ കേസ് മഹാരാഷ്ട്രയിലേക്ക് മാറ്റിയതിനാൽ ഗുജറാത്ത് സർക്കാറിന് പ്രതികളെ വിട്ടയക്കാൻ അവകാശമില്ലെന്നായിരുന്നു സുപ്രീം കോടതിയുടെ വിലയിരുത്തൽ. തുടർന്ന് പ്രതികൾക്ക് നൽകിയ ഇളവ് പരമോന്നത നീതി പീഠം റദ്ദാക്കി. അന്ന് രാജ്യത്തെ മനസാക്ഷിയുള്ളവരും ജനാധിപത്യ വിശ്വാസികളും ആശ്വസിച്ചു. ഖേദകരമെന്ന് പറയാം, അതേ നീതിപീഠമാണ് രാജ്യത്തെ ഞെട്ടിച്ചുകൊണ്ട് രണ്ട് പ്രതികൾക്ക് ഇപ്പോൾ ജാമ്യം നൽകിയിരിക്കുന്നത്.

ഭയവിഹ്വലയായ ബിൽക്കീസും കുടുംബവും ഇന്ന് ഗുജറാത്ത് വിട്ടിരിക്കുകയാണ്. കൊടും കുറ്റവാളികൾക്ക് പോലും ജാമ്യവും ഇളവും അനുവദിക്കുന്ന ഇന്ത്യയിൽ തന്നെയാണ് ഉമർ ഖാലിദും ഷർജീൽ ഇമാമുമെല്ലാം ഉള്ളത്. 2020 ൽ സിഎഎ പൗരത്വ നിയമ ഭേദഗതിക്കെതിരെ സംസാരിച്ചതിന്റെ പേരിൽ യുഎപിഎ ചുമത്തി ജയിലിൽ കഴിയുന്ന ഉമർ ഖാലിദിനും ഷർജീൽ ഇമാമിനും പൂർണമായ ശിക്ഷ ഇളവ് നൽകാൻ ഇനിയും നീതിപീഠത്തിനായിട്ടില്ലെന്നത് ഖേദകരമാണ്.

രാജ്യത്തിന്റെ അഖണ്ഡതയ്ക്കും പരമാധികാരത്തിനും സുരക്ഷയ്ക്കും ഭീഷണിയാകുന്ന നിയമവിരുദ്ധ പ്രവർത്തനങ്ങളെയും ഭീകരവാദ പ്രവർത്തനങ്ങളെയും തടയുന്നതിനായി ഇന്ത്യൻ പാർലമെന്റ് 1967 ൽ പാസാക്കിയ നിയമമാണ് UAPA (Unlawful Activities Prevention Act) എന്നത്. പക്ഷേ, പിൽക്കാലത്ത് ഈ നിയമത്തിൽ വന്ന ഭേദ​ഗതികൾ ദുരുപയോ​ഗത്തിന്റെ ആക്കം കൂട്ടി.

‘ഇന്ത്യ എക്സ്ക്ലൂഷൻ റിപ്പോർട്ട്’ (India Exclusion Report) എന്ന പ്രസിദ്ധീകരണത്തിന് വേണ്ടി മനുഷ്യാവകാശ അഭിഭാഷകയായ വാരിഷാ ഫറാസത്ത് (Warisha Farasat) ഭീകരവാദ വിരുദ്ധ നിയമങ്ങളെക്കുറിച്ച് ഒരു പഠനം നടത്തിയിട്ടുണ്ട്. ഇരുപത്തിയൊന്നാം നൂറ്റാണ്ടിൽ രാഷ്ട്രീയ-നിയമ വ്യവഹാരങ്ങളിൽ ഏറ്റവും കൂടുതൽ ഉപയോഗിക്കപ്പെടുകയും ചർച്ച ചെയ്യപ്പെടുകയും ചെയ്ത പദങ്ങളിലൊന്നാണ് ‘ഭീകരവാദം’ (Terrorism) എന്ന നിരീക്ഷണം ഈ പഠനത്തിന്റെ ആമുഖത്തിൽ തന്നെ അവർ പങ്കുവെക്കുന്നുണ്ട്. യു.എ.പി.എ പോലെയുള്ള ഭീകരവാദ വിരുദ്ധ നിയമങ്ങൾ രാജ്യത്ത് വ്യാപകമായി ദുരുപയോഗം ചെയ്യപ്പെടുന്നുണ്ടെന്നും, പ്രത്യേകിച്ച് ന്യൂനപക്ഷങ്ങൾക്കും ദലിതർക്കും ആദിവാസികൾക്കും രാഷ്ട്രീയ വിയോജിപ്പുകൾ രേഖപ്പെടുത്തുന്നവർക്കും എതിരെ ഇവ പ്രയോഗിക്കപ്പെടുന്നുണ്ടെന്നും വാരിഷാ ഫറാസത്ത് ഈ പഠനത്തിൽ വിശദമായി ചൂണ്ടിക്കാണിക്കുന്നുണ്ട്.

വാരിഷാ ഫറാസത്ത്

അതിന്റെ ഇരകളാണ് ഷർജീൽ ഇമാമും ഉമർ ഖാലിദുമെല്ലാം. ബീബി ഖാത്തൂന്റെ മുതിർന്ന മൂന്ന് മക്കളായ ഷംഷീർ, സുൽത്താൻ, സ്വാദിഖ് എന്നിവരുടെ ദുരിത പൂർണമായ ജീവിതം ‘മുസ്ലിമായിപ്പോയി, അതിനാൽ’ എന്ന പുസ്തകത്തിൽ ഹർഷ് മന്ദർ വിവരിക്കുന്നുണ്ട്. സബർമതി എക്സ്പ്രസ്സ്‌ തീ വെച്ച കുറ്റത്തിൽ വർഷങ്ങളായി വിചാരണ പോലും ചെയ്യപ്പെടാതെ ജയിലഴികൾക്കുള്ളിൽ കഴിയുന്നവരുടെ പ്രതീകമാണ് ആ മൂന്ന് മക്കൾ. ഒരുവശത്ത് കുറ്റം തെളിയിക്കപ്പെടാതെയും വിചാരണ പോലും പൂർത്തിയാകാതെയും നിരപരാധികൾ ജീവിതത്തിന്റെ നല്ലൊരു പങ്കും ഇരുമ്പഴികൾക്കുള്ളിൽ ഹോമിക്കുമ്പോൾ, മറുവശത്ത് കൊടുംക്രൂരതകൾക്ക് ശിക്ഷിക്കപ്പെട്ടവർക്ക് നിയമത്തിന്റെ പഴുതുകളിലൂടെ സ്വാതന്ത്ര്യം ലഭിക്കുന്നു. നിയമത്തിന് മുന്നിൽ എല്ലാവരും തുല്യരാണെന്ന ഭരണഘടനാ തത്വം ഇവിടെ ചോദ്യം ചെയ്യപ്പെടുകയാണ്. നീതി എന്നത് എല്ലാവർക്കും ഒരുപോലെ ലഭ്യമാകേണ്ട അവകാശമാണെന്നിരിക്കെ, അത് അധികാരത്തിന്റെയും സാമൂഹിക പദവിയുടെയും അളവുകോലുകൾക്കനുസരിച്ച് നിർണ്ണയിക്കപ്പെടുന്നിടത്തോളം കാലം, നമ്മുടെ ജനാധിപത്യത്തിന്റെ ആത്മാവ് മുറിവേറ്റുകൊണ്ടേയിരിക്കും. ബിൽക്കീസ് ബാനു കേസ് അതാണ് വീണ്ടും, വീണ്ടും ഓ‍ർമ്മിപ്പിക്കുന്നത്.

Also Read