Help us in our pursuit for high-quality journalism!
Our commitment to uncovering requires your backing. Support our fearless investigative reporting, in-depth analyses and community voices. Donate now to strengthen the editorial independence and provide open access content to all.
Support Keraleeyam Choose your preference
₹1000/Year
₹2000/2 Years
₹500Students/Year
A contribution of any size

കേരളത്തിന്റെ കാർഷിക മേഖലയ്ക്ക് മേൽ എൽ നിനോ പ്രതിഭാസം ഇതിനകം തന്നെ ഗുരുതരമായ പ്രത്യാഘാതങ്ങൾ സൃഷ്ടിക്കാൻ തുടങ്ങിയിരിക്കുന്നു. മൺസൂൺ മഴയിലുണ്ടായ അപ്രതീക്ഷിത കുറവും അന്തരീക്ഷ താപനിലയിലുണ്ടാകുന്ന ക്രമാതീതമായ വർദ്ധനവും സംസ്ഥാനത്തെ നെൽക്കർഷകരെ കടുത്ത ആശങ്കയിലേക്കാണ് തള്ളിവിടുന്നത്. കേരളത്തിന്റെ നെല്ലറകളായ കുട്ടനാടൻ പാടശേഖരങ്ങൾ മുതൽ പാലക്കാടൻ സമതലങ്ങൾ വരെ ജലക്ഷാമത്തിന്റെയും ഉപ്പുവെള്ള ഭീഷണിയുടെയും നിഴലിലാണ്. നമ്മുടെ സമ്പദ്വ്യവസ്ഥയിലും പൊതുവിതരണ സംവിധാനത്തിലും ഏറ്റവും നിർണായക സ്ഥാനം നെല്ലിന് തന്നെയാണ്. അരി ലഭ്യതയിൽ അടുത്തമാസങ്ങളിൽ ഉണ്ടായേക്കാവുന്ന കുറവിനെക്കുറിച്ച് ഇതിനകം തന്നെ ആശങ്ക ഉയർന്നിട്ടുണ്ട്. ആവശ്യത്തിന് സംഭരണം നടത്തുന്നതായി കേന്ദ്രസർക്കാർ പറയുന്നുണ്ടെങ്കിലും എഥനോൾ ഉൽപ്പാദനത്തിനായി ഗോഡൗണുകളിൽ നിന്ന് വൻതോതിൽ പൊടിയരിയും മറ്റും ഉപയോഗിക്കുന്നത് ആശങ്ക വർധിപ്പിക്കുകയാണ്. ഇന്ധന ഉൽപാദനമാണോ ഭക്ഷണമാണോ പ്രധാനമെന്ന ചോദ്യമാണ് പ്രതിപക്ഷം ഉയർത്തിയിട്ടുള്ളത്.
ഉപജീവനവും ഭക്ഷ്യസുരക്ഷയും
കോടിക്കണക്കിന് കർഷകരുടെ ഉപജീവനവും രാജ്യത്തെ വലിയൊരു ജനവിഭാഗത്തിന്റെ ഭക്ഷ്യസുരക്ഷയും അരി ഉൽപാദനവുമായി ബന്ധപ്പെട്ടിരിക്കുന്നുവന്നതിനാൽ രാജ്യത്തെ അരി ഉൽപാദനത്തിലുണ്ടാകുന്ന ചെറിയമാറ്റം പോലും കാർഷിക വിപണിയിലും ഉപഭോക്തൃ വിലനിലവാരത്തിലും വൻ പ്രത്യാഘാതങ്ങൾ സൃഷ്ടിക്കും. 2026–27 ഉൽപാദന വർഷത്തിൽ ഇന്ത്യയിലെ അരി ഉൽപാദനം 15.40 കോടി ടണ്ണിൽനിന്ന് 14.70 കോടി ടണ്ണായി കുറയുമെന്നാണ് കാർഷിക ഏജൻസികളുടെ വിലയിരുത്തൽ. ഏകദേശം 70 ലക്ഷം ടണ്ണിന്റെ കുറവാണ് ഉൽപാദനത്തിലുണ്ടാവുക. ഈ ഇടിവിനൊപ്പം അരിവില കിലോഗ്രാമിന് 49.42 രൂപ എത്തിയെന്നത് വിലക്കയറ്റത്തിന്റെ വ്യക്തമായ സൂചനയാണ്. പണപ്പെരുപ്പവും ഉയർന്നു കഴിഞ്ഞു.

കേവലം ഉൽപാദനക്കുറവിന്റെയോ കാലാവസ്ഥാ വ്യതിയാനത്തിന്റെയോ ഫലം മാത്രമല്ല ഈ ഉൽപാദനക്കുറവെന്നാണ് കേന്ദ്ര ഏജൻസികളുടെ ഏറ്റവും ഒടുവിലത്തെ ഡേറ്റകൾ വിശകലനം ചെയ്യുമ്പോൾ മനസ്സിലാവുക. നെൽകൃഷിയുടെ വിസ്തൃതി, ഉൽപാദനക്ഷമത, കാലാവസ്ഥ, സർക്കാർ സംഭരണം, പൊതുവിതരണം, കയറ്റുമതി, എഥനോൾ നയം, വിപണിയിലെ ആവശ്യകത എന്നിവയെല്ലാം പരസ്പരം ബന്ധപ്പെട്ടു കിടക്കുന്ന വിഷയങ്ങളാണ്.
കണക്കുകളുടെ മുന്നറിയിപ്പ്
നൽകിയിരിക്കുന്ന കണക്കുകൾ പ്രകാരം 2014 മുതലുളള ഇന്ത്യയിലെ അരി ഉൽപാദനത്തിന്റെ വളർച്ച ഇങ്ങനെയാണ്:

2015–16ലുണ്ടായ ഉണ്ടായ ചെറിയ ഉൽപാദന ഇടിവിനുശേഷം തുടർച്ചയായി ഉൽപാദനം വർധിച്ചിരിക്കുന്നു. എന്നാൽ എൽ നിനോ ആഘാതത്തിൽ 2026–27-ൽ വീണ്ടും ഗണ്യമായ ഇടിവിനാണ് സാധ്യത. ഇതിനകം തന്നെ സർക്കാർ കണക്കുകൾ അതിന്റെ സൂചനകൾ നൽകുന്നു.
15.40 കോടി ടണ്ണിൽനിന്ന് 14.70 കോടി ടണ്ണിലേക്കുള്ള കുറവ് ഏകദേശം 4.55 ശതമാനമാണ്. 70 ലക്ഷം ടൺ എന്നത് ചെറിയ അളവല്ലേ എന്ന് പറഞ്ഞ് തള്ളാൻ കഴിയില്ല. രാജ്യത്തിന്റെ ഭക്ഷ്യധാന്യ വിതരണത്തിലും സംഭരണത്തിലും അതിന്റെ സ്വാധീനം പ്രകടമാകും. 2025–26-ലെ 15.40 കോടി ടൺ കണക്ക് കേന്ദ്രസർക്കാരിന്റെ മൂന്നാം മുൻകൂർ ഉൽപാദന കണക്കുകളുമായി പൊരുത്തപ്പെടുന്നതാണ്. എന്നാൽ 2026–27-ലെ 14.70 കോടി ടൺ എന്നത് വ്യവസായ-വിപണി മേഖലയിലെ വിലയിരുത്തലായി കാണുന്നതാണ് നല്ലത്.
കാലാവസ്ഥയിൽ കുരുങ്ങി ഉൽപാദനക്ഷമത
നെല്ലിന്റെ ഉൽപാദനത്തെ നേരിട്ട് സ്വാധീനിക്കുന്ന പ്രധാന ഘടകം മൺസൂൺ തന്നെയാണ്. കാലവർഷ മഴയുടെ സമയക്രമത്തിലും വിതരണത്തിലുമുണ്ടാകുന്ന വ്യതിയാനം, അളവിലുള്ള കുറവ്, അതിവർഷം, വരൾച്ച, താപനിലയിലെ വർധന, ജലസേചന കുറവ് എന്നിവ ഉൽപാദനക്ഷമതയെ ബാധിക്കുന്നു. നെല്ലിന്റെ വളർച്ചയുടെ വിവിധ ഘട്ടങ്ങളിൽ കാലാവസ്ഥയ്ക്ക് നിർണായക പങ്കുണ്ട്.
വിതയ്ക്കൽ സമയത്ത് മഴ ലഭിക്കാതിരിക്കുന്നത് കൃഷിയുടെ വിസ്തൃതി കുറയ്ക്കും. തൈകളുടെ വളർച്ചാഘട്ടത്തിലെ വരൾച്ച ചെടികളുടെ വളർച്ചയെ പ്രതികൂലമായി ബാധിക്കുന്നു. പൂവിടുന്ന ഘട്ടത്തിലെ ഉയർന്ന താപനില കതിരിലെ മണികളുടെ രൂപീകരണത്തെയാണ് ബാധിക്കുക. വിളവെടുപ്പ് സമയത്തെ അതിവർഷം ധാന്യത്തിന്റെ ഗുണനിലവാരവും സംഭരണക്ഷമതയും ഇല്ലാതാക്കും. അതിനാൽ ഉൽപാദനക്കുറവിന്റെ പിന്നിലെ കാരണങ്ങൾ പരിശോധിക്കുമ്പോൾ മൊത്തം മഴയുടെ അളവ് മാത്രമല്ല, മഴയുടെ വിതരണവും കൃഷിയുടെ ഘട്ടങ്ങളും തമ്മിലുള്ള സൂക്ഷ്മ ബന്ധവും പരിശോധിക്കണം.

ഭക്ഷ്യധാന്യവും ഇന്ധനവും തമ്മിലുള്ള മത്സരം
ഇന്ത്യയുടെ എഥനോൾ മിശ്രിത ഇന്ധന നയവും (Ethanol Blended Petrol – EBP Programme) രാജ്യത്തെ നെൽകൃഷിയിലെ വിളവ് കുറവും (അരി ലഭ്യതയിലുണ്ടാകുന്ന കുറവും) തമ്മിൽ നേരിട്ടും അല്ലാതെയും വളരെ ശക്തമായ ബന്ധമുണ്ട്. പെട്രോളിൽ 20% എഥനോൾ ചേർക്കുക (E20) എന്ന ലക്ഷ്യത്തിലേക്ക് രാജ്യം നീങ്ങുമ്പോൾ അത് കാർഷിക മേഖലയിലും ഭക്ഷ്യസുരക്ഷയിലും വലിയ ചലനങ്ങൾ സൃഷ്ടിക്കുന്നുണ്ട്. പെട്രോളിൽ എഥനോൾ കലർത്തുന്നതിലൂടെ ക്രൂഡ് ഓയിൽ ഇറക്കുമതിയെ ആശ്രയിക്കുന്നത് കുറയ്ക്കുക, വിദേശനാണ്യ ചെലവ് നിയന്ത്രിക്കുക, പുനരുപയോഗ ഊർജസ്രോതസ്സുകൾ പ്രോത്സാഹിപ്പിക്കുക തുടങ്ങിയ ലക്ഷ്യങ്ങളാണ് കേന്ദ്രസർക്കാർ നയത്തിനുള്ളത്. എഥനോൾ ഉൽപാദിപ്പിക്കാനുള്ള അസംസ്കൃത വസ്തുക്കളിൽ കരിമ്പ്, ചോളം, കേടായ ഭക്ഷ്യധാന്യങ്ങൾ, എഫ്സിഐയുടെ അധിക അരി തുടങ്ങിയവ ഉൾപ്പെടുന്നതിനാലാണ് ആശങ്ക ഉയരുന്നത്.
ഭക്ഷ്യസുരക്ഷ ഉറപ്പാക്കേണ്ട സമയത്ത് എഥനോളിനായി അരി ഉപയോഗിക്കുന്നതിന്റെ യുക്തിയാണ് പ്രതിഷേധങ്ങൾക്ക് കാരണമായി മാറിയിരിക്കുന്നത്. എഥനോളിനായി എഫ്സിഐയുടെ അധിക അരി ഉപയോഗിക്കുന്നത് സാങ്കേതികമായോ സാമ്പത്തികമായോ തെറ്റാണെന്ന് പറയാനാവില്ല. ദീർഘകാലം സംഭരിച്ചുവയ്ക്കുന്നതിലൂടെ ഗുണനിലവാരം നഷ്ടപ്പെടുന്ന അധിക സ്റ്റോക്കുകൾക്ക് മൂല്യവർധിത ഉപയോഗം കണ്ടെത്തുന്നു എന്നാണ് സർക്കാർ പറയുന്നത്. എന്നാൽ ഭക്ഷ്യധാന്യ ലഭ്യതയിൽ സമ്മർദമുണ്ടാകുമ്പോൾ ഈ നയത്തിന് കടുത്ത നിയന്ത്രണങ്ങളും മുൻഗണനാക്രമവും ആവശ്യമായി വരും.
നവംബർ മൂന്നിലെ പുതിയ ടെൻഡർ വ്യവസ്ഥയനുസരിച്ച് എഫ്സിഐയുടെ മിച്ചം വരുന്ന അരിയിൽ നിന്ന് എഥനോൾ ഉൽപാദനത്തിന് 324 കോടി ലിറ്ററാണ് പരിധി. കേടായ ഭക്ഷ്യധാന്യങ്ങളിൽനിന്നുള്ള ഉൽപാദനത്തിന് 160 കോടി ലീറ്റർ പരിധി. രണ്ടുംകൂടി 484 കോടി ലിറ്റർ എഥനോൾ ഉൽപാദിപ്പിക്കുകയാണ് ലക്ഷ്യം. എന്നാൽ ഭക്ഷ്യസുരക്ഷയും ഊർജസുരക്ഷയും മുന്നിലെത്തുമ്പോൾ, സാഹചര്യം അതീവ ഗൗരവമെങ്കിൽ ഭക്ഷ്യസുരക്ഷയ്ക്കാണല്ലോ മുൻഗണന ലഭിക്കേണ്ടത്. എഥനോൾ ഉണ്ടാക്കാൻ ഉപയോഗിക്കുന്ന ഭക്ഷ്യധാന്യങ്ങളുടെ അളവ്, അവയുടെ ചെലവ്, കർഷകർക്ക് ലഭിക്കുന്ന വില, ഉപഭോക്താക്കൾക്ക് ഉണ്ടാകുന്ന വിലക്കയറ്റം എന്നിവ വ്യക്തമായി പരിഗണിക്കണം. അതിന് ആവശ്യമെങ്കിൽ നയം തന്നെ തിരുത്തണം.
അരിവിലക്കയറ്റം നേരിട്ടുള്ള ആഘാതം
കഠിനമായ വരൾച്ചയുടെ ഭീഷണി മുൻപിൽ നിൽക്കേ അരിവില കുത്തനെ ഉയരുന്നതാണ് നിത്യജീവിതത്തിന് നേരിട്ടുള്ള ആഘാതം. സമൂഹത്തിന്റെ താഴേത്തട്ടിലുള്ള കുടുംബങ്ങളെ വിലക്കയറ്റം ബാധിച്ചുതുടങ്ങി. വിലയുടെ കയറ്റ കണക്ക് അതിന്റെ വേഗം വ്യക്തമാക്കുന്നു.

2014–15-ലെ 27 രൂപയിൽ നിന്ന് 50 രൂപയായി ഇപ്പോൾ ഉയർന്നുവെന്നാൽ ഏതാണ്ട് 83 ശതമാനമാണ് വലവർധന. ഇതിൽ നഗരങ്ങളിലും പ്രാദേശികമായും ചില വ്യത്യാസങ്ങളുണ്ടാകാം. പൊതുവില വർധനയാണ് ഇവിടെ അവതരിപ്പിച്ചിരിക്കുന്നത്. വർധനയുടെ ആഘാതം എല്ലാ വിഭാഗം ഉപഭോക്താക്കളിലും ഒരുപോലെയല്ല. കുറഞ്ഞ വരുമാനമുള്ള കുടുംബങ്ങൾക്ക് ഭക്ഷണച്ചെലവിന്റെ വലിയൊരു ഭാഗം അരിക്കായി നീക്കിവയ്ക്കേണ്ടിവരും.
ഹോട്ടലുകൾ, ചെറുകിട ഭക്ഷ്യസംരംഭങ്ങൾ, കാറ്ററിങ് സ്ഥാപനങ്ങൾ എന്നിവയുടെ പ്രവർത്തനച്ചെലവ് ഉയരും. പൊതുവിതരണ സംവിധാനത്തിൽ സബ്സിഡി ചെലവ് വർധിച്ചേക്കും. ഭക്ഷ്യവിലക്കയറ്റം മറ്റ് ഉപഭോഗച്ചെലവുകളെയും ബാധിക്കും. അതിനാൽ അരിവിലയിലെ വർധന ഒരു കാർഷിക വിപണി പ്രശ്നം മാത്രമല്ലെന്ന് ഒാർമിക്കണം. അത് കുടുംബങ്ങളുടെ നിത്യജീവിത ചെലവിനെയും പൊതുസാമ്പത്തിക വ്യവസ്ഥയെയും സാരമായി ബാധിക്കുന്ന വിഷയമാണിത്.

സ്റ്റോക്ക് ഉണ്ടായിട്ടും വില ഉയരുമ്പോൾ
എഫ്സിഐ ഗോഡൗണുകളിൽ, ക്ഷാമം മുന്നിൽകണ്ട് അരി, ഗോതമ്പ് ഉൾപ്പെടെയുള്ള ഭക്ഷ്യധാന്യങ്ങളുടെ ശേഖരം ശക്തമാക്കാൻ കേന്ദ്രസർക്കാർ നേരത്തേ നടപടി ആരംഭിച്ചിരുന്നു. നിരന്തര നിരീക്ഷണവും നടത്തുന്നുണ്ട്. എല്ലായിടത്തും അത് പൂർത്തിയാക്കിയെന്നാണ് അറിയിപ്പും. വിവിധ ഏജൻസികൾക്ക് വരൾച്ച നേരിടാനുള്ള പ്രതിരോധ നീക്കങ്ങൾക്കും നിർദ്ദേശം നൽകിയിട്ടുണ്ട്. എന്നാൽ സ്റ്റോക്ക് വൻതോതിൽ ഉണ്ടായിരിക്കേ വിപണിയിൽ അരി വില കുതിക്കുന്നത് എന്തുകൊണ്ടെന്നതിന് ഉത്തരമില്ല.
സ്റ്റോക്കും വിപണിയിലെ ലഭ്യതയും രണ്ടായതുകൊണ്ടുള്ള കാരണങ്ങൾ ഈ വിലക്കയറ്റത്തിന് പിന്നിലുണ്ടാകാം. ഗോഡൗണുകളിലുള്ള അരി ഉടൻ ചില്ലറ വിപണിയിൽ എത്തണമെന്നില്ല. മറ്റൊന്ന് സംഭരണവും വിതരണവും ലേലവും ഗതാഗതവും ഉൾപ്പെടെയുള്ള സംവിധാനങ്ങളുടെ കാര്യക്ഷമതയും ഈ സാഹചര്യത്തിൽ നിർണായകമാണ്. വിപണിയിലെ ആവശ്യകതയിലെ മാറ്റവും സ്വാധീനം ചെലുത്തുന്നു. എഥനോൾ വ്യവസായം, കാലിത്തീറ്റ വ്യവസായം, കയറ്റുമതി തുടങ്ങിയ മേഖലകളിൽ നിന്നുള്ള ആവശ്യകത വർധിക്കുമ്പോൾ വിപണിയിൽ ലഭ്യമായ അരിയുടെ അളവിൽ വിവിധതലങ്ങളിൽ നിന്ന് സമ്മർദമുണ്ടാകാം. അത് വിലക്കയറ്റത്തിന് വഴിതുറക്കും.
ഉൽപാദനം വരുംദിവസം വൻതോതിൽ കുറയുമെന്ന സൂചനകൾ സംഭരണ തീരുമാനങ്ങളെയും വിപണിയിലെ വിലനിർണയത്തെയും സ്വാധീനിക്കാം. ഗതാഗതം, സംഭരണം, മില്ലിങ്, പാക്കിങ്, മൊത്തവ്യാപാരം, ചില്ലറവ്യാപാരം തുടങ്ങിയ ഘട്ടങ്ങളിലെ ചെലവുകളും അന്തിമ വിലയെ സ്വാധീനിക്കുന്നവയാണ്. അതിനാൽ വില നിയന്ത്രിക്കാൻ സർക്കാർ സ്റ്റോക്ക് മാത്രം പോരാതെ വരും. ആവശ്യമനുസരിച്ച് വിപണിയിലേക്ക് ധാന്യം എത്തിക്കാൻ വിതരണ സംവിധാനവും സജ്ജമാകണമെന്ന് നിർദ്ദേശമുയർന്നിട്ടുണ്ട്.
അരി കയറ്റുമതിയും ആഭ്യന്തര വിപണിയും
ലോകത്തിലെ പ്രധാന അരിക്കയറ്റുമതി രാജ്യങ്ങളിൽ മുന്നിലാണ് ഇന്ത്യ. അതിനാൽ വിലക്കയറ്റ സാഹചര്യത്തിൽ കയറ്റുമതിയിലെ നിയന്ത്രണത്തിന് നയം വേണമെന്നാണ് പ്രതിപക്ഷത്തിന്റെ ആവശ്യവും നിർദ്ദേശവും. 2022-ൽ ഇന്ത്യ നുറുക്കരിയുടെ കയറ്റുമതി നിരോധിച്ചെങ്കിലും. 2025 മാർച്ചിൽ നിരോധനം നീക്കി. നുറുക്കരിയുടെ കയറ്റുമതിയിൽ വീണ്ടും നിയന്ത്രണമുണ്ടാകുമെന്ന സൂചനയുണ്ട്. കയറ്റുമതിയിലൂടെ കർഷകർക്ക് മെച്ചപ്പെട്ട വില ലഭ്യമാക്കൽ, ആഭ്യന്തര വിപണിയിൽ ആവശ്യത്തിന് അരി എത്തിക്കൽ, ഉപഭോക്താക്കൾക്ക് താങ്ങാവുന്ന വില ഉറപ്പാക്കൽ, കയറ്റുമതിയിൽ വിശ്വാസ്യത നഷ്ടപ്പെടാതിരിക്കൽ എന്നിവ കേന്ദ്ര സർക്കാരിന്റെ മുന്നിലുള്ള വെല്ലുവിളികളാണ്. രാഷ്ട്രീയ നീക്കങ്ങൾക്കും, പ്രതിപക്ഷത്തെ തൃപ്തിപ്പെടുത്താനുള്ള പൊടിക്കൈകൾക്കും ഉപരി വസ്തുനിഷ്ഠമായ നടപടികളാണ് ആവശ്യം.
കേരളത്തിന്റെ പ്രതിസന്ധികൾ
എൽ നിനോ സാഹചര്യത്തിലെ അരിയുടെ ഉൽപാദനക്കുറവും നഷ്ടവും കേരളത്തിനെയാണ് കൂടുതൽ ഗൗരവമായി ബാധിക്കുക. സംസ്ഥാനത്തിന് വേണ്ട അരിയുടെ ഭൂരിഭാഗവും ആന്ധ്രപ്രദേശ്, തെലങ്കാന, തമിഴ്നാട്, കർണാടക തുടങ്ങിയ സംസ്ഥാനങ്ങളിൽ നിന്നാണ് എത്തിക്കുന്നത്. അതിനാൽ അരിയുടെ ലഭ്യതയിലെയും വിലയിലെയും ഏതു ചെറിയ മാറ്റവും കേരള വിപണിയെ കാര്യമായി സ്വാധീനിക്കും. അരിയുടെ കാര്യത്തിൽ ആശങ്കയുണ്ടെന്ന് കഴിഞ്ഞ ദിവസം മുഖ്യമന്ത്രിയും വ്യക്തമാക്കിയിരുന്നു. ദേശീയതലത്തിൽ ഉൽപാദനം കുറയുകയും വില ഉയരുകയും ചെയ്താൽ കേരളത്തിനായിരിക്കും ശക്തമായ തിരിച്ചടിയുണ്ടാവുക.
കേരളത്തിന്റെ നെൽകൃഷിയുമായി ബന്ധപ്പെട്ട് ചില പ്രധാന നയപരമായ ഇടപെടലുകൾ ആവശ്യമാണ്. അത് പല മേഖലകളിൽ, പല തലത്തിലും സമയത്തും നിരന്തരം ചർച്ചചെയ്യപ്പെടുന്നതാണെങ്കിലും വിഷയത്തിൽ ഫലം ഉണ്ടാകുന്നില്ല. നിലവിലുള്ള വയലുകളും കൂടി നിരപ്പാക്കി കൂടുതൽ നിർമ്മാണ പ്രവർത്തനങ്ങളിലൂടെ വികസനം ഉറപ്പാക്കണമെന്ന നിലപാടുള്ള വൻലോബിയുടെ സമ്മർദ്ദത്തിലാണ് അധികൃതർ. നോക്കിയിരിക്കേ പാടങ്ങൾ ഇല്ലാതാകുന്നു. അതിനുവേണ്ടി നെൽകൃഷിക്കെതിരായ പ്രചരണങ്ങൾ, വിത്തിടുന്നത് മുതൽ ആരംഭിക്കുന്നു. സംഭരണവും വില വിതരണവും വൈകിച്ചും വൈകിപ്പിച്ചും കർഷകരെ കൃഷിയിൽ നിന്ന് അകറ്റുന്നതും പാടം നികത്തലിന്റെ ഭാഗമായി വേണം കാണാനെന്ന് കർഷകർ ആരോപിക്കുന്നുണ്ട്.
സംസ്ഥാനത്തിന്റെ ആകെ അരി ഉൽപാദനത്തിന്റെ 40 ശതമാനം അധികവും പാലക്കാട് ജില്ലയിൽ നിന്നാണ് (ഏതാണ്ട് 2.15 ലക്ഷം ടൺ). ആലപ്പുഴയും തൃശൂരുമാണ് തൊട്ടുപിന്നിൽ. കേരളത്തിന് വർഷത്തിൽ 35 മുതൽ 40 ലക്ഷം ടൺ വരെ അരിയാണ് ആവശ്യം. ശരാശരി 38 ലക്ഷം ടൺ എന്ന് കണക്കാക്കാം. മാസം എതാണ്ട് 2,90,000– 3,30.000 ടണ്ണും ഒരു ദിവസത്തേക്കാണെങ്കിൽ 1.04 കോടി കിലോഗ്രാം അരിയും വേണം. വീടുകൾ, ഹോട്ടലുകൾ, കാറ്ററിങ്, റേഷൻ വിതരണം എന്നിവയെല്ലാം ഉൾപ്പെടെയുള്ള കണക്കാണിത്. അതിന്റെ 14 ശതമാനമാണ് സംസ്ഥാനത്ത് ഉൽപാദിപ്പിക്കുന്നത്. ബാക്കിയെല്ലാം മറ്റ് സംസ്ഥാനങ്ങളിൽ നിന്ന് എത്തിക്കുന്നു. ഗോതമ്പിന്റെയും മറ്റ് ഭക്ഷ്യവസ്തുക്കളുടെയും ഉപയോഗം വിവിധരീതിയിൽ കൂടിയതിനാൽ ആളോഹരി അരി ഉപഭോഗത്തിൽ മുൻ വർഷങ്ങളെ അപേക്ഷിച്ച് നേരിയ കുറവുണ്ടെന്ന് കണക്കാക്കുന്നു.

നയപരമായ തീരുമാനങ്ങൾ
ഭക്ഷ്യസുരക്ഷ പ്രതിസന്ധിയിൽ, കേന്ദ്രസർക്കാർ സ്വീകരിക്കേണ്ട നടപടികളെക്കുറിച്ച് വിദഗ്ധർ പല പ്രധാന നിർദ്ദേശങ്ങളും മുന്നോട്ടുവയ്ക്കുന്നു. അതിൽ പലതും നയപരമായ തീരുമാനം വേണ്ടതാണ്. അരി ഉൽപാദനം ദേശീയലതത്തിൽ വ്യക്തമായി വിലയിരുത്തണം. സംസ്ഥാനങ്ങളിലെ നെൽ കൃഷിയുടെ വിസ്തൃതി, വിളവ്, ഉൽപാദനം എന്നിവ സംബന്ധിച്ച് യഥാസമയം കൃത്യമായ വിവരങ്ങൾ പൊതുജനത്തിന് ലഭ്യമാക്കണം. ഭക്ഷ്യസുരക്ഷയ്ക്കാവശ്യമായ ബഫർ സ്റ്റോക്ക് ഉറപ്പാക്കിയശേഷം മാത്രമേ അധിക അരി മറ്റ് വ്യാവസായിക ആവശ്യങ്ങൾക്ക് അനുവദിക്കാവൂ. ഭക്ഷ്യധാന്യങ്ങൾ, ചോളം, കരിമ്പ് തുടങ്ങിയ അസംസ്കൃത വസ്തുക്കളുടെ ഉപയോഗത്തിൽ ഭക്ഷ്യസുരക്ഷയ്ക്കും കർഷകരുടെ വരുമാനത്തിനുമാണ് മുൻഗണ നൽകേണ്ടത്.
എഥനോൾ ഉൽപാദനത്തിനായിരിക്കരുത് പ്രാധാന്യം. വരൾച്ചയെയും വെള്ളപ്പൊക്കത്തെയും അതിജീവിക്കുന്ന നെല്ലിനങ്ങൾ, ശാസ്ത്രീയ ജലസംരക്ഷണം, കൃത്യമായ കാലാവസ്ഥാ മുന്നറിയിപ്പ് എന്നിവ വാർഡുതലത്തിൽ ലഭ്യമാക്കണം. അരിവില അമിതമായി ഉയരുന്ന സാഹചര്യത്തിൽ ഓപ്പൺ മാർക്കറ്റ് സെയിൽസ് സ്കീം ഉൾപ്പെടെയുള്ള സംവിധാനങ്ങൾ കാര്യക്ഷമായും ശക്തമായും വിനിയോഗിക്കണം.
രാജ്യത്തിന്റെ എഥനോൾ നയം ഊർജസുരക്ഷയുടെ ഭാഗമായി പ്രാധാന്യമുള്ളതായിരിക്കാം. എന്നാൽ വരൾച്ചയുടെയും പ്രതിസന്ധിയുടെയും സാഹചര്യത്തിൽ ഭക്ഷ്യധാന്യങ്ങളുടെ ലഭ്യതയും ന്യായമായ വിലക്ക് അവ ഉപഭോക്താക്കൾക്ക് ലഭിക്കുകയും തന്നെയാണ് പരമപ്രധാനം. എഥനോളുമായി ബന്ധപ്പെട്ട നടപടികളിൽ ഈ സാഹചര്യം തടസപ്പെടുന്നുണ്ടെങ്കിൽ അതുസംബന്ധിച്ച നയം പുനപരിശോധിക്കപ്പെടുകതന്നെ വേണം. എഥനോൾ ഉൽപാദനത്തിന്റെ പശ്ചാത്തലത്തിൽ അരി വെറുമൊരു കാർഷിക ഉൽപന്നം മാത്രമായി കാണരുത്. ഇന്ത്യയുടെ ഭക്ഷ്യസുരക്ഷയുടെയും ഗ്രാമീണ സമ്പദ്വ്യവസ്ഥയുടെയും സാമൂഹിക സുരക്ഷാ സംവിധാനത്തിന്റെയും അടിസ്ഥാന ഘടകമാണ് നെൽകൃഷിയും അരി ഉൽപാദനവും.
ഒരേസമയം കൃഷിവിസ്തൃതി കുറയുകയും ഉൽപാദനച്ചെലവ് ഉയരൽ, രൂക്ഷമായ കാലാവസ്ഥാ വ്യതിയാനം, കൂടുതൽ ഭക്ഷ്യധാന്യങ്ങൾ വ്യാവസായിക ആവശ്യങ്ങൾക്കായി മാറ്റിവയ്ക്കുക എന്നിവയുണ്ടായാൽ അരിവില നിയന്ത്രിക്കൽ പ്രയാസമാകും. അത് സമൂഹത്തിലുണ്ടാക്കുന്ന പ്രത്യാഘാതം ഭയങ്കരമായിരിക്കും. രാജ്യത്തിന്റെ ഊർജലഭ്യത ഉറപ്പാക്കേണ്ടത് അനിവാര്യം തന്നെയാണ്. അതിന്റെ പേരിൽ ഭക്ഷ്യസുരക്ഷയും സാധാരണക്കാരന്റെ ഭക്ഷണാവകാശവും അപകടത്തിലാക്കരുതെന്നാണ് വിദഗ്ധരും പ്രതിപക്ഷവും ആവശ്യപ്പെടുന്നത്.

